Khi Phaningkhui Ngasak Mimao (Covid-19) Atamli Church Makāla Khalei hi, Ngayila?

by Themshang Horam

Church Makāla Khalei Hi Ngayila?

Aruihon ithumwui ramli Sunday thang church makāla khalei hi ngachāla? Biblena mayāla? Church makāla Vareshi sapaila? Hi ithumwui shitkasang khangazan kajitheila? Aja okthot hili mimao (Covid-19) kharā hina maram sāda okathui apam kachungkhali Vareshila zangda khorum khavai shim (mosques, temples, churches, cathedral…) shung ngarokser haira. Imaram Tangkhul kaphunglila kazāt hi maman khavai ningkhangashar sāda ithumwui churchla kachungava shunghaira. Chiwuivang ithum Sunday kachida kaziplaga seihā sākhangarum hi masamphangthura. Hiwuivang mi kachungkhana mamayā khangai tarākhala phongshok papamhaira, hi lākhashong eina hāngsa jiakha Tangkhulnaobing hi manglārinli kakahao kala Church kākhangai misera kaji shankhui ngasaka.

Church Kashung (close) hi Biblical Sāla?

Khare sāda, atam kashakhawuivang kayāng mashokla ichi-chawui shimli pamlaga Vareli seihā sākapam hi Biblena mayāya. Egypt ngaleili Varena Egyptnaobingwui naochizaiwui tungli mimao tāshung khangasak (Plague on the Firstborn) chitharan Israelnao khipālikha kayāng mashok ngasakmana (Exo. 11:1-10). (Also c.f. Isaiah’s apocalypse, Chapters 24-27; especially, 26:20-21).

Kakhaneli, kazāt hi maman khavai Tangkhul Longnao kala Governmentnala yarui kazip hi masāmi khavai chizami kahai lei. Vareshi akha sāda ithumna chili khayāshiphalungra khiwuivang khala jiakha Paulna shorkar kala ramungabingwui kahāng nganāda athumli katom khavai ithumli tamjitheihai (Rom. 13:1-7; 1 Pet. 2:13-14; Ti. 3:1-2).

Kakathumali, Sunday thang church makakāwui khamataiya kharinva “kazāt” (Covid-19) hi khipakhali maman khavaiwuivang māngmaya. Governmentna kala Longnaobingna kakhāmwuivang church makakā maningmana. Churchwui kakahao kala kharinva mipha (member) saikora Jishuwui mangā eina ‘shalom’ mirin kharing samkaphang hina. Shalom kaji hi ningla, phasāla kala manglārinla mathānlak eina kharing hili kahāngna. Sunday thang Church kālaga kazāt mankhui maronhaida kachikatha avānao akhawui shimkhurli kathi-kasar, kakhanang-kachot kala sikafa samphang ngasakhaiakha hina church khaleiwui kharin sāza ngasaka.

Khamateli, achālagawui Vareshibing, New Testament wui atamli church building maleiranglaga aja ithumna sāda khalei thada shim-shimli kaziplaga Vareli khorum sāya. Shimkhur kachida Vareli hamkasangwui atheiva okathui achikun vāpeida Varewui paokhamatha hi ngayaovāya. Zurthing, raikhai, sā-kazāt kala kathi-kasārnala mahaprarmana. Chiwuivang eina, church makāpaila khalei hi Varena kaphā khuirākhaminada khuilaga ithum katonga ichichawui shimli Vareli khorumphalungra.

Church Makāla Vareshi Sāpaila?

Hebrews 10:25li ithum kaziprumchingda akha eina akha kasatsang ngarokta shitkasang mataisang khavai hāngmathinhai. Kala Romans 12:5; 1 Corinthians 12:12-27; Ephesians 3:6; 4:15-16; 5:23; Colossians 1:18,24 li Church hi Khristawui asāna chiwuivang eina phasā akai ithum hi ngasun (kazip) khangarok hi maleiakha maringpaimana kaji kapihaiya. Chiwuivang eina Vareshina jiakha kaziprumlaga Vareli ashang akha sāda khorum khangarum hi makhalei masāpaimana. Church makakā masāpaimana. Kha atam-atamwui kasak athishurda kazip khangarum hi masāpaisālala kathākwui lungli kaziprumlaga khorumpai khavai khamatha atam chi khuirami khavai ithum seihā sāra.

Otshot (Covid19) Hina Ithumli Khi Phaningkhui Ngasak?

Shenglak eina hāngsa jiakha, aruihon church makāpaila khalei hi ithumwuivang Varena khamatha apong khuirākhamina, chiya:

  1. Sunday kachida church kāzatta kha nawui manglārin hi kachishong zatlakli khala kaji phaningkhui khavai atam ngasāya. Yaruili tuntun-shangshangda otram ngathazatlaga nawui manglarinwui phasa (health) kathalakli kaji hi majukhui khavai sāsa.

  2. Nashi/nawui shimkhur seihā sākhangarum (family worship/devotion) makhalei hi ajawui eina leikhui khavai khamatha aponglāka.

  3. Ichichawui shimli Vareshi katongana seihā kasā tharan, achalaga Vareshi haophoktha-tar atamwui thada ithumwui manglārinlila khamathuk rāshungda ithumwui Vareshi kasā kashungmei ngasakra.

  4. Hikatha kazāt kharā eina ithumli Vareli nganai ngasakta mirin hi ali chihamlaga okthui khavai phaningung ngasaka.

  5. Mikumo ithum theithangmei kazingram kāshunghaida tuimatui-otsakli Vare makhalei thada ringkahai thot hili ithumli Vare leiya kala a mazangkha ithum khikha mathukmana kaji phaningkhui ngasaka.

  6. Otshot hina Vareshi akha sāda ithumwui ningkahak, miwuivang phaningkhami kala ngachon khangarokwui aponglila phaningkhui ngasaka. Mili khangachon kaji hi Khristana awui thi kashurabingli sāngasakngaimeithui kaji otsak akhana. Hikatha kasak atamli mili ngachonki kaji hi kapai ot maningmana kha Khristali kashura mi akha sāda kasak-kapai chili khāngkhui khavai sāphalungra.

Atam Hili Manglarin Kathada Rarsang Ngasaksi?

Sunday thang church makāthuwada mi kachungkhana Tangkhulnao bingwui manglarin suitāhaora kaji kakhanang mi leiya. Kha Sunday thang church kashunghi (closed) nawui seihā kasā kala Bible kapā shungkakham maningmana. Church makathuwada seihāla masāmara kala Biblela mapāmara kaji hi khanganuiya Vareshiwui otsakna. Church makālala na khalatta kala nawui shimkhur Bible pālaga atam kachida seihā sārumching paiya.

  1. Thotwui reikasangwui athishurda akap-akai(technology) hiwui khangachonla khuilaga WhatsAppli, Facebookli Group Bible Study sapaiya.
  2. Youtube, TV (God Channel) kathāli kathemabingwui sermon/lecture nganāpaiya.

  3. Nawui Pastor lah Mission Worker nana katheibingli phone sālaga nawuivang, nawui shimkhurwuivang seihā sāmi ngasakpaiya.

  4. Mathahailakla seihā sāchinglu, Bible pāchinglu kala nawui shimkhur seihā sākharum mangasāmhailu.

Kakup (Conclusion)

Tangkhul Vareshi hi manganuilui mana. Anu (milk) manglaga kharing atam maninglui mana kha zāt zālaga kharing atamna. Nganuilaga ava-avāna phākhaui (feeding) chithada aruila phāuichinglu kaji chi ithum machihānluiasa. Aruihon atam makhamathawui athishurda hunakhawuivang nawui manglarinwui kashak-kazā chi churchli mazākhuipailala nakhalatta ringthei khavai hotnāhalungra.  Varena somiranu!

Disclaimer: The Arek do not claim ownership of this article. You will find this article in author Facebook page entitled: Church Makāla Khalei Hi Ngayila? A Short Theological-Ethical Reflection. The Arek Team change the title for the purpose of it’s esteem readers.

Click here to contact Themsang Horam, Education Secretary Tangkhul Baptist Church Association.

Author: ArekEditor

The Arek is an online repository journal published in English and Tangkhul languages. It is solely for educational purposes in the forms of online archives.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s