COVID – 19 Hina Tangkhulli Khi Ngachei Ngasakpaili Khala

by: Tuisem Shimrah

COVID – 19 mimao (pandemic) hina okathui apam kachivali michang makhaila saza ngasak haira. Mi sorkhangasai thisang haira kala chungkhameina kazada lei, kaikhanala kharai samphanghaira. Kazat hili khangarar hina ngalei (country) kachivali apong kachungkhali sheisha khangasak khuiramihaira (multidimensional effect). Lansinli ngazansang ngasak haira, wortam shim (educational institutions) kala office/dharma shim (churches, temples, mosques hkt.) shungngasak haira, otpam shimanngasak haira kala mi yamung yamva ngarokta pakhangapa khuiramihaira. India wui PM, Qr Narendra Modina kahang, ―Fighting against COVID – 19 pandemic is no less than a war‖.

Aja COVID-19 hina maram sada ayar ngalei apam ngatei ngateidawui eina shimli hannungkida ima Tangkhulnaobing sorkhangasai leida lei. Kachungkha ungzang haira, aruila ungzangki kachi kachungkha leifaya. Ram kachivana athumbingli quarantine sakhavai shim sakchanglak eina khangaran sami haira. Shorkarnala lan kachungkha heitami haira kala ima Tangkhulli leida khalei Long, civil societies, minganing (MLAs/Councillors), government executives, NGOs, kala ram ramwui longnao katongana yang- pangshap, lan kala atam chikatta ot sada lei.

Chieina ngasoda athumwui mangashong kharing kharakwui vang ithumna thuklak eina khamachuk darkar sahaira. Maramma mi mashing hiyakha ungkazang hina ithumwui yaruirin, manglarin, lansinrin kala phasarin apong ayayavali ngachei ngasak kapai maram leihaowa. Khangachei hi khiwui ngarei (direction) khuira khala kachi hi ithumwui pangli khaleina. Atam leilaga ningyek (strategy) kasem atam ngasahaira.

Ungzangki kachibing (reverse migration) hi matailak eina ot kasanao (employees), ot phada khaleibing (job seekers and aspirants) kala katamnaobing (students) hibing hina. Horzak kahai mi mashing matheirarsalala rough estimate eina mi 10000 to 20000 alungli leisapaira da khuiya. Athum hi khanuithot tamkhui kahai yaron ngala zingkum (age group) 20-40 years hina kachunga sasara. Hina kachitheipava naongarabing hi mikumo akhawui mirinli phasawui (physical) kala ningchuk (mental) pangmeithui kachi atam (stage) sahaoda otmanga hakmeithuida khuikashap (most productive stage) atamlaka. Hanungda khaleibing hiwui eina ithumna apong khani eina theikhuiya, chiya:

  • Mi mashing hiyakhana shim hankhaung (reverse migration) sada khalei hina theikhangasak pava, ishi Tangkhulnaobing hi public or orgnised sectorli full time employee machungmana kha unorganized sectorli kasana chungmeikharda lei kachi theikhui ngasaka. Job security maleithuda lockdown sangashada awui tolop ngasammi kahai hina maram sada maokthuikapai rahaowa.

  • Athumbing hi kachungava sada khalei otpam chi chihochang hailaga shimshong ungpamchang haoki kachi, kaikhana awui business hi shimshong base sahaoki kachi kachungkha zangsara.

Hikatha situation hili ima Tangkhul pangsin kakhui eina ngasoda khangaran kasa darkar sahaira. Mi mashing hiyakhana ngaraikachaiya atamli (same time) ashangva sada (group) ungki kachi hili machuk kharikta pangsinkhuida khamashung shongfali thankazat hi ithumwui thangkhameina. Mi mashing chungkasang hieina ngasoda ram ramwui kharing kharakli ngachei kapai (influences) apong kachungkha leida lei. Chibing chiya:

Yaruirin kala manglarin

Metropolitan citiesli atam sharakha pamsahaokada ram (villageli) ungkapam eina cultural shock or crisis leikapai lei. Chimang maningla kashuirak (unplanned) eina hankhaung sahaoda mirinwui direction shiman kahai thadala leisara. Naongara hiyakha hi talent ayur peida zangsara; kaikhana leadership quality khalei, kaikhana technology singkathei (skill), kaikhana dharmarin kazatta, kaikhanava leikhalonli kathem, kaikhanava sportsli, kaikhana music kala laa sakathei, zangsara. Mi kaikhava khangarui, mangkaza, ari arai kashichin, khali kasa kala minamlaga okathui naongarala zangsara.

Khamashung shongfa chithei khami kala thanva khami hi mahuinapai mara. Hi haklak kahai challenge akhana. Atam chada athumwui shongfa (course) mashungkhuihai akha ima yurwui vang sakkhamataiya lan ngasara kha ngasharta handle masa akha ima yur shiman kapaiwui apong akhanada theikhui.

Hi ithum katongawui contribution darkar saya. Matailak eina naongarabingwui ava ava ngara ngashar phalungra. Nathumwui cooperation kala ningkahak demand saya. Churchwui role haklak eina leiya. Pastorbing, missionarybing kala kathanabingna thanda manglarinwui shongfa (roadmap) machukmilu. Longrei, longphang, ramwui longnao (institutions) kachiva policy khayek kala khangazip darkar sahaira. Tangkhulwui MLAs kala Councillorbingwui contribution kahaka darkar sahaira. Khanuithot hiyakhawui kharing kharak (livelihood) wui vang machukmi phalungra. Ima yurwui vang naongara ungkazang hina kharitta otphun mangasala kha kala khamahai (opportunity) akha ngasa kapai leiya.

Lansin (economy)

Covid 19 hina ngalei (nation) wui lansin (economy) suitameikhar haira. Reikasangwui ot (Developmental works) kachungkha sakaza leihaira kala ithumwui samphangran kachungkha katatmi kahai shokfara. Arui eina tangdala ithumwui mashun (rights) kala samphangran (previledges) kachungkha tampakwui mibingna ngaphonthui haira. Kathannabing, matailak eina ithumwui minganingbing ngachang kameida (active kasameida) ot kasa darkar sahaira. Hiwui atam hili Politics/partywui ningrin (feeling) maleipainara. Rai kasa atamli yur hupvana ngararki kachina. Chiwui vang eina ithum khalatta coordination and consultation leimeida ot kasa darkar sahaira.

Mimao khara eina ngasoda chamrei (famine/impoverishment) khara hi khangachana. Virus mang maningla kathai kachamwui eina kathi kasar kala kachot kachang kachungkha samphanga. Thangmeida ot kasabingwui vanga opportunity ngavaserra. Yanglu ithumli Varena somida mashalak kahai kala tumlak kahai ngalei hirikha leida lei. Athei arai, hanthing hanra kala kashak kaza ayur peida lingkhui kapai ngaleina. Kuingatok zangda ngachang kaka eina ngasoda ot saakha mirin ringshi khavai khikha maleimana. Environmentli concern leilaga ot samphalungra.

Aja Govt. of Indiana Covid-19 li khangarar (response) kasa sada lupa kachungkha heitami haira. Chiwui lungli luivat (agriculture) sectorwui vang sharuk kahakva zangda lei.

Unemployment

Covid-19 hina okathuiwui ngalei katongali otpam (employment) kachungkha sazahaira. International Labour Organization (ILO) wui estimate athi shurda kazat hina teomeithuida 1.25 billion (equivalent to 37.5% of workforce) wui otpam shiman kapai apong leihaira kala arui arui 2.7 billionli sazada lei. Arui arui Indiali unemployment rate hi 23.2% li leida lei.

Chitha akha khipalongli masaza mara khala? Technologyli specialized kasabing kala pangthem kathem (skill) khaleibingli masazamara. Athumva atam kachivali ot leisashonra. Chiwui vang eina otsak akhali specialization leikhavai hotna phalungra.

Indiawui PM na economic package sada Rs 20 lakh crore khuikashokwui ningrin hiva khalatta khanganing (self-reliance) kachi hili rinna. Crisis (kachot) khalei hili pangshap samphang kakhui (or opportunity) kala khalattawui sakashap khuikashok atam ngasa khavai saphalungra. Example sada, Covid-19 mararanglaga India hi Personal Protective Equipments (PPEs) kala N95 mask hi masemsa mana. Ajava Indiawui lungli thang thangli (everyday) 200,000 PPEs kala 200,000 N95 masks semshokta lei.

Education

Katam kashawui pongli khangachei kachungkha rahaira. Social distancing leihaoda contact class hi malei kapai hina maram sada ithumwui teaching-learning modalities ngachei phalungra. Schools/colleges close sahailaga kasaikha mapampai mara. Aruihon MOOCs (Massive Open Online Courses) zatnalak eina leida lei. Online classes, asignments kala assessment hi software shichinlaga computer kala mobile phone eina ot sangarokta lei. Ojabing training khuimiserlu. ̳Work from Home‘ concept hi adopt samiserlu.

Class X eina Class XII wui result shokrada lei. Matha khamei institution ayarli leihaoda lairik kathemnaobing ayar ngaleili atamthui khangarok hi khare atamli leisai. Kha ajakumva katamnaobing ayar mashokla ramwui schools/colleges li tamngarok haora. Naoshinao kaikhanava ana tamda khalei college chihohailaga shimshongli ungtamki kachi zangkapsara.

Hitharan atamli leida khalei institutions kachiva status review and update saphalungra, kaja katamnao hiyakhawui future semkhami hi yurli kasemna. Infrastructure development kala expansion leimi phalungra. Science laboratories mathameida leimi phalungra. Quality teaching and learningwui vang khamatha faculty recruit samilu Academic audit hi makhalei masapaimana. Digital age sahaokada okathuiwui reikasang chili ngarumda zatkhavai atam atamli ojabingwui short term courses/training programme khalei phalaka. TKS hi katamnao organization sahaokada athumna yangsangmi phalungra. Tangkhul Scholars‘ Associationwui khangachon darkar saakha mathanthuthup eina ngachonmira. Ramnaowui kuingatok mi khangateiwui reisang khavai vang (Brain drain) mangasala shim hankhaung (reverse migration) hina imaramwui reikasangwui vang thangmet hankhaung (reverse brain drain) ngasa khavai sasa.

Covid-19 hina maram sada atam akhali ithumwui ngalei hi ayarli chiham kasa (depend) salaga okthui kasa chi ara ayarli katom kashapa (support/supply) ngalei ngasa khavai hotnasa.

Disclaimer: The Arek do not claim ownership of this article. This article is written by Dr. Tuisem Shimrah, President Tangkhul Scholar’s Association, Assistant Professor, University School of Environment Mangament, GGSIP University, New Delhi.

To cite this article: Shimrah,T. (2020). Covid-19 Hina Tangkhul Li Khi Ngachei Ngasakpaili Khala. Antalagí Ideón [Sharing Ideas for a Better Tommorow], 1(1) , 16-18.

Author: ArekEditor

The Arek is an online repository journal published in English and Tangkhul languages. It is solely for educational purposes in the forms of online archives.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s